52 të arrestuar gjatë kurorëzimit të mbretit

Policia londineze arrestoi 52 persona ditën e kurorëzimit të mbretit Charles i Tretë.

Policia metropolitane deklaroi se kishte qenë “privilegji i saj i madh” për të garantuar sigurinë e asaj dite, përpara se të njoftonte numrin e të arrestuarve në kryeqytet.

Në total, 14 persona u arrestuan tek shëtitorja “The Mall”, 13 prej të cilëve po protestonin, ndërsa njëri nën dyshimin se posedonte drogë dhe armë të ftohta.

14 të tjerë u arrestuan ndërkohë në Lindje të Londrës nën dyshimin se komplotonin për të shkaktuar pasiguri publike.

Gjashtë të tjerë ranë në pranga në Uajt Holl, pesë prej të cilëve nën dyshimin e organizimit të trazirave dhe tjetri për sjellje të pahijshme.

Për akuza të ngjashme u arrestuan edhe personat e tjerë, në zonat Seint Martins Llejn, Soho, Uellington Arç, e të tjera.

Disa prej të dyshuarve, të pajisur me parulla kundër mbretërisë, synonin të prishnin rendin publik, deklaruan autoritetet policore londineze.

Sidoqoftë, ceremonia e kurorëzimit e mbretit Charles i Tretë dhe mbretëreshës Camilla shkoi e qetë, pavarësisht numrit të lartë të personave të pranishëm për ta ndjekur atë.

LEXONI GJITHASHTU: